حوارات : هذه مجموعة حوارات تحدث قدرا بيني وبين صديق أو زميل أو مواطن أعرفه أو لا أعرفه , علي المقهي أو في قطار الدرجه الثالثه أو علي مصطبة في القريه وأنقلها إلي حضراتكم مع بعض التعديل خوفا من العواقب الأمنيه لأن مثل هذه الأحاديث يكون فيها من الكلام ما لو نشرناه كاملا لذهبنا وراء الشمس
أحمد خفاجي: عرفت الي حصل لفاروق حسني
أحمد خفاجي: موش ربنا اخزاه وسقط في انتخابات اليونسكو
المواطن: دى اقل حاجة لامثالة من المطبعين
أحمد خفاجي: بس فيه ناس زعلانه علي وكستو ,ومفكرين ان دي نكسه عربيه تانيه
المواطن: بالعكس اصدقائة قبل اعدائة فرحانين فية , المثقفين وعامة الشعب
أحمد خفاجي: انا نفسي فرحان , بلاش نبلي العالم ببلاوينا
المواطن: يا عم كنا نبليهم المهم اننا نخلص منة
أحمد خفاجي: وبعدين مين يصدق ان فاروق حسني يمثل ثقافتنا العربيه
المواطن: ومين قالك انة بيمثل ثقافتنا
أحمد خفاجي: ده واحد واقف ضد كل قيمنا
المواطن: إزاي يعني
أحمد خفاجي: ضد الحجاب وضد ثقافتنا الإسلاميه ,وبعدين فيه شبهات وحشه اوي عليه ,يعني هي اشاعات بس حاجه زباله اوي ربنا يستر علينا
المواطن: اولا خلينا نتفق ان سقوطة فى اليونسكو اشد من صفر المونديال
أحمد خفاجي: لا صفر المونديال ده كان صفر صعب اما سقوط فاروق حسني فكان ذي ما نكون بنشوط كوره وتطلع اوت
المواطن: ياعم مصر بعتت تشحت اصوات الناس عشانة ودة محصلش فى المونديال
المواطن: هوة اللى عمل فى نفسة كدة دة الابن المدلل
المواطن: طب والله هوة فعلا مدلل
أحمد خفاجي: ده الوزير الملل عشان بتاع الثقافه والحاجات الكعب العالي
المواطن: عمل كوارث فى مصر ورغم ذلك لسة على قلبنا
أحمد خفاجي: انا معترض علي وجود وزاره للثقافه من اصلو
المواطن: فاكر حريق مسرح بنى سويف , دة اهم انجازاتة
أحمد خفاجي: ايوه , بس سؤالي هل هناك ضروره لوزاره للثقافه
أحمد خفاجي: تعرف دي بيشتغل فيها اكثر من مية الف واحد وفيها فساد مستشري
المواطن: مفيش ضرورة لاى وزير ثقافة او غيرة
أحمد خفاجي: يعني بعيدا عن فاروق ووكستو
المواطن: مهو ه الوزير الفاسد لازم يكون وراة مرؤسين فاسدين
المواطن: تعرف انة وعدك اليهود لو نجح فى اليونسكو
المواطن: يروح يشكرهم فى اسرائيل
أحمد خفاجي :إنت منيين جبت الكلام ده
المواطن: كل الدنيا عارفه الكلام ده ,لكن ربناة كسفة ووكسة
أحمد خفاجي:يا عم لازم نكون دقيقين في نقل الكلام ومعرفة مصادرو ما ينفعشي نتكلم كده عن الناس حتي لو كانو ناس إحنا مختلفين معاهم
المواطن: يا عم دماغك مصادر إيه وبدنجان إيه الدنيا كلها سمعت الكلام ده منو وتعرف كمان فىه مجموعة من المثقفين الشرفاء جمعوا توقيعات لرفها للمؤسستات الدولية تطالب باسقاطة لانة من دعاة التطبيع
أحمد خفاجي:بص وزارة الثقافه ذيها ذي وزارة الشباب والرياضه ذي وزارة الإعلام ذي وزارة الأوقاف وإصرار الحكومه علي السيطره علي مساجد المسلمين كلها أدوات للسيطره واستعباد الشعب وتغييب وعيه إستغربت أوي لما سألو فاروق حسني عن إنتخابات الرياسه الجايه , هيدي صوتو لمين , واجاب انو ما فيش في الساحه الا جمال مبارك او هو ما يعرفش غيرو ,وانو لما يكون فيه حد تاني هيقارن بينهم ويشوف
المواطن: ايوة مهم بيخدموا على بعض
أحمد خفاجي: واحنا ما فيش حد بيخدم علينا
المواطن: اهو انت قولت بنفسك
أحمد خفاجي: وكأن وزير ثقافة مصر لا يري من عقول مصر ورجالاتها الا جمال مبارك
المواطن: بالذمة ده كلام يحصل في القرن الواحد والعشرين
أحمد خفاجي: حاجه تقرف
أحمد خفاجي: ما احنا كان عندنا جمال قبل مده
المواطن: كلاهما جاء بلا خلفية سياسية
المواطن: بلا رؤية حقيقة للمنصب
المواطن: كلاهما اتى دون رغبة من الجماهير
المواطن: كلاهما لا يتمتع باى قبول جماهيرى
المواطن: لكن واة من لكن هذة , اتى ومن خلفة جحافل الامن المركزى , الامن و العصا , تفرض مالا يفرض
المواطن: شعب اعزل ومجموعة من اللصوص معهم كل وسائل القهر والقمع ماذا تنتظر
أحمد خفاجي: انت بتجرجرني في الكلام
المواطن: يا عم انت متجرجر لوحدك
أحمد خفاجي: وانا متجرجر بطبيعتي
أحمد خفاجي: اه ما انا باقول بردو
المواطن: بص
أحمد خفاجي: بس موش عايز اغلط في جمال الأولاني لأني أكن له الكثير من الحب والإحترام و ربنا يرحمو
اما جمال التاني ربنا يرحمنا منو
المواطن: طيب هاغلط انا براحتي وانت خليك ملتزم عشان انت عندك عيال
المواطن: اما انا مقطوع
المواطن: بص يا عمنا , جمال ماشى مع رجالتة بمنطق شيلنى واشيلك , بص لي بعين اديك وزراة , اطعم الفم تستحى العين
المواطن: ودى السياسة , خليك فى ديلى , اديلك احلى وزارة , واسيبك تسرق وتلهط انت واللى خلفوك
المواطن: طب لو جة حد غير جمال , طب مهو هيجب حد غير فاروق
المواطن: يبقى خلاص , يفضل جمال ويفضل فاروق
المواطن: احنا عندنا فى مصر حاجة العالم كلة محروم منها
أحمد خفاجي: ايه الفول المدمس؟؟؟
المواطن: يا عم فول إيه هو إحنا بقينا نشوفو غير في رمضان , حكامنا شبة السلع المعمرة وحكامهم شبة السلع الاستهلاكية
المواطن: يارب تكون فهمت
أحمد خفاجي: يبقي سؤال سقوط فاروق حسني
المواطن: مالة
أحمد خفاجي: هل هو سقوط لمكانة مصر او تعبير عن انهيار مكانتها
المواطن: لالا
أحمد خفاجي: ام انه سقوط لراجل لا يصلح لهذه المكانه
المواطن: الفشل هنا لشخصة
أحمد خفاجي: يعني الحكومه المصريه هي سبب السقوط والا فاروق هو سبب الوكسه السوده
والا اتلم تنتون علي تنتن
المواطن: والله الحكومة وفاروق هما سبب وكستنا جوة وبرة
أحمد خفاجي: الأول نتن والتاني انتن
المواطن: هههههههههههههههههه حلوة
المواطن: بس عايز اقول شى خلينا نعترف بحاجة حكومتنا الغير موقرة
المواطن: لا تجيد نغمة العمل الجماعى
المواطن: ومن ينجح خارج مصر بيكون شخص اشتغل لوحدو واعتمد على نفسة
المواطن: مثال
أحمد خفاجي: ايوه
المواطن: ان الدكتور بطرس غالى عندما تم اختيارة لرئاسة الامم المتحدة
المواطن: كان فى قبول عالمى لة , واحترام شديد لمصريتة
المواطن: وعالمنا الكبير الرائع دكتور محمد البرادعى
أحمد خفاجي: بص بطرس غالي طلع مقلب موش فاكر البوسنه والهرسك ومواقفو ال زي الزفت
المواطن: احنا بنتكلم فى المبدا عموما
أحمد خفاجي: وانا ما بقولشي كده عشان هو مسيحي
أحمد خفاجي: لا
المواطن: ورغم ذلك
المواطن: امريكيا جندت نفسها لاسقاط بطرس غالى وفاروق حسنى بالاشتراك مع المنظمات اليهودية
أحمد خفاجي: ده سؤال مهم جدا
أحمد خفاجي: هل الصهيونيه العالميه
أحمد خفاجي: عايزه تستخدم الناس دول ويخلوهم عبره لغيرهم او لاي واحد عايز يوصب للمناصب الكبيره دي
وانو لازم عليه انو ينبطح تماما امامه
المواطن: لا الصهيونية العالمية مش عايزة تسمع صوت لاى عربى او مسلم سواء انبطحوا امامها ام لا , بدليل ان فاروق حسنى استدر عطفهم بكل وسيلة ورمى كرامتة تحت احذيتهم وعزم احد الموسقيين الاسرائليين ليعزف فى الاوبرا
أحمد خفاجي: اه تعرف ليه
المواطن: ووعدهم بمزيد من التطبيع الثقافى فى حالة فوزة
المواطن: لية
أحمد خفاجي: لانهم فاهمين حاجه بسيطه جدا احنا موش عايزين نفهمها , ان العربي والمسلم مهما حصل هيتنو عربي , لانهم كيهود وصهاينه ,عارفين انهم هيظلو يهود وصهاينه مهما حصل ,فلو فيه احتمال واحد في الميه ان فاروق حسني يقلب راجل عربي من جديد ,موش هيدولو الفرصه دي و كمان دي فرصه لممارسة القوه واستعراضها
المواطن: وعارفين اننا كمصريين بالذات لن نتقرب لهم ولن نسمح لهم بان يقتربوا مننا
أحمد خفاجي: و كمان عشان يثبتو للعالم ولنا اننا دخلنا الي عصر الصهيونيه , ارجع واقول لك , انا ما زعلتش علي سقوط فاروق حسني والا شوفت حد زعلان في مصر
المواطن: بالعكس
أحمد خفاجي: ربنا يخلي ايامنا كلها افراح
المواطن: الناس كانت بتهنى بعض عقبال اللى بالى بالك لما يسقط
المواطن: عارفو؟؟؟ والا اقولك اسمة
أحمد خفاجي: انا ما أعرفش حد
المواطن: والا بلاش انت راجل صاحب عيال
أحمد خفاجي: لا انا موش عارفو
أحمد خفاجي: والا عايزك تقول لي
المواطن: خلاص يا عم بلاش
أحمد خفاجي: والا عدت عايز اقعد معاك
أحمد خفاجي: وهدور لي علي مصطبه تانيه
المواطن: طب والشاى
أحمد خفاجي: سلامو عليكم موش ناقصه بلاوي الحيطان ليها ودان